Günther Grass d amaru almani, yuwey Arraz n Nobel deg tsekla. Deg usefru-a, Grass iwet-d deg tsertit tisṛayilit mgal Iṛan akked webdad ay tebded Lalman ɣer yidis n Isṛayil deg wanect-a. Aɣmis almani Die Zeit (ay d-itteffɣen yal dduṛt), yugi ad d-yessuffeɣ asefru-a, maca iɣmisen n Süddeutsche Zeitung, La Repubblica ed New York Times ssuffɣen-t-id.

Ayɣer ur d-nniɣ
Ayɣer acḥal aya ssusmeɣ
Ɣas akken tidet tban
Aṭas aya seg wasmi ay la ssewjaden
Ma d nekkni s wid ay imenɛen
Sufella kan ay d-nerna

Bɣan ad wten d imezwura
Ad snegren aɣref n Iṛan
La isellen i ubelheddaṛ
Ssebba bɣan ad tt-afen, nnan yettheyyi lbumba

Maca ayɣer ur d-beddreɣ ara
Tamurt-nni niḍen
Ay tt-yesɛan acḥal aya
Teffer-itt, yiwen ur tt-yeẓri
Tesnernay deg lbumbat-nnes
Yerna yiwen ur tt-yessenqad
Imi yiwen ur as-ɛemmden ?

Susmen akk, ɣas yella waya
Nekk daɣen susmeɣ yid-sen,
Maca ḥulfaɣ s teɛkemt n tkerkas
Tuffra n tidet d alugen
Win ara d-ineṭqen ad ixelleṣ:
Ad as-inin yekṛeh Udayen

Ass-a ttwaliɣ deg tmurt-inu
Igan taxeṣṣart ur yesɛin tamtilt
Fell-as tettxelliṣ ed mazal ad txelleṣ
Tessenz, wa yenna-ak s yedrimen
Wayeḍ yenna-ak d aɣram kan
Taneḍḍabt [sous-marin] i Isṛayil
D ttawil ayyes zemren
Ad aznen lbumbat-nsen
Ad quccen tameddurt deg tmurt
Aydeg ur yetbit tella lbumba
Ur ufin lateṛ-nnes
Maca asmi ara yeqqel ccek d ttbut
Ad d-iniɣ ayen yessefken

Ayɣer acḥal aya ay ssusmeɣ ?
Acku ɣef ljal n laṣel-inu
Yumsen s wayen tga tmurt-inu
Kukraɣ ad d-neṭqeɣ s tidet
Kukraɣ ad zzmeɣ ɣef Isṛayil
D tamurt wukud lliɣ ed bɣiɣ ad kemmleɣ ad iliɣ d ameddakel

Ayɣer armi d imir-a ay d-neṭqeɣ,
Mi akka ay iwsireɣ yerna tekkaw tedwat-inu,
Akken ad d-iniɣ lbumba n Isṛayil
Tezmer ad teswaɣ talwit n umaḍal?

Acku yessefk ad d-nini ass-a
Ayen ay izemren ad ifat azekka
Yerna nekkni s Walmaniyen, s ccḥani ay d-nerbeḥ seg umezruy-nneɣ
Nezmer ad nettekki deg txeṣṣart niḍen
D tin ay ibanen tezmer ad d-teḍru
Ihi ma nettekka deg-s, nɛemmed

Steɛṛfeɣ daɣen yerna ur mazal ad ssusmeɣ
Acku ɛyiɣ seg tkerkas n Utaram [lɣerb]
Ssarameɣ ad ilin aṭas seg wid
Ara yerẓen leqyud n uzaglu n tsusmi
Ad inin i win yettgallan s uxeṣṣar
Ad yejj abrid n yimenɣi
Ad yeqbel ad yettussenqed
Leslaḥ yellan deg Isṛayil
Am wakken ara yettussenqed wayen yellan deg Iṛan
D lejnas ara ten-yesfeqden
S wemsefham akk gar-asen

D aya kan ara iɛawnen
Isṛayiliyen ed Yifalesṭiniyen
Ed wakk iɣerfan niḍen
D aytmaten yemseɛdawen, ɣas akken ddren kifkif
Deg tama-a ay tettxatal tisselbi
Ad aɣ-iɛawen ula d nekkni