TLAXCALA تلاكسكالا Τλαξκάλα Тлакскала la red internacional de traductores por la diversidad lingüística le réseau international des traducteurs pour la diversité linguistique the international network of translators for linguistic diversity الشبكة العالمية للمترجمين من اجل التنويع اللغوي das internationale Übersetzernetzwerk für sprachliche Vielfalt a rede internacional de tradutores pela diversidade linguística la rete internazionale di traduttori per la diversità linguistica la xarxa internacional dels traductors per a la diversitat lingüística översättarnas internationella nätverk för språklig mångfald شبکه بین المللی مترجمین خواهان حفظ تنوع گویش το διεθνής δίκτυο των μεταφραστών για τη γλωσσική ποικιλία международная сеть переводчиков языкового разнообразия Aẓeḍḍa n yemsuqqlen i lmend n uṭṭuqqet n yilsawen dilsel çeşitlilik için uluslararası çevirmen ağı la internacia reto de tradukistoj por la lingva diverso

 22/10/2017 Tlaxcala, the international network of translators for linguistic diversity Tlaxcala's Manifesto  
English  
 AFRICA 
AFRICA / Tukksa n ussehres seg Uneẓruf Utrim
Date of publication at Tlaxcala: 16/06/2016
Original: La descolonización del Sáhara occidental
Translations available: عربي  English  Français 

Tukksa n ussehres seg Uneẓruf Utrim

Ahmed Boukhari احمد بخاري

Translated by  Omar Mouffok عمر موفق

 

 

 

Taseɣrut n Ahmed Boukhari, agensas n Terni n Polisario deg Yeɣlanen Yeddukklen, deg Usarag ɣef Tukksa n Ussehres ay d-yellan deg Managua (Nicaragua)  

Ahmed Boukhari, d amaslaḍ seg Tmarit (secretariat) taɣelnawt n Terni n POLISARIO yernu d agensas (représentant) n POLISARIO deg Yeɣlanen Yeddukklen deg New York, iga-d inaw deg Usarag n Tukksa n Ussehres ay d-yellan deg Managua, Nicaragua, gar 31 Mayu d 2 Yunyu 2016. D wa ay d aḍris ummid n yinaw-nnes.

 

Mass Aselway, inesmugal ɛzizen ed yemttekkiyen deg usarag,

 

Ad bduɣ awal-inu s wesnemmer n unabaḍ ɛzizen n Tegduda n Nicaragua ɣef lxir d wemɛawen ay la yettemɛawan ed Yeɣlanen Yeddukklen i lmend n tukksa n ussehres (decolonisation), yernu d aya ay t-yeǧǧan ad yemmager asarag-a i tikkelt tis snat deg Managua, tamurt n Sandino.

 

Bɣiɣ daɣ ad faṛseɣ tagnit-a akken ad henniɣ anmahal (ambassadeur) n Tegduda Tabulivaṛit n Venezuela, Mass Rafael Ramirez, imi ay yettwafren d aselway n Useqqamu Uzzig (spécial) n 24. Netthenni daɣ Tanarit ad as-d-ibedden i lmendad deg uxeddim-nnes akken ad yesseddu ɣer sdat iswan ay iwekkel wemɣiwan agraɣlan i Useqqamu n 24.

 

Mass aselway,

 

I lmend n tegnit-a, ed wakk tignatin yezrin, tamagla (délégation) n Terni n POLISARIO, s yisem-nnes d tagensast tuzrift (légitime) n weɣref n Uneẓruf Utrim, s yisem n yimenɣi-nnes ɣezzifen i weslelli aɣelnaw d tissuḍeft tagraɣlant deg ukatar n tneɣtust 34/37 (1979) n Useqqamu Amatu d tneɣtusin ay d-iḍefren, tettekkay deg usarag-a akken ad txebber Aseqqamu Uzzig ɣef tegnit yerzan Aneẓruf Utrim. Nebɣa daɣ ad d-nessiweḍ tabṛat ɣef laman ay nga deg Useqqamu deg wayen yerzan dduṛ-nnes ay yessefk ad ikemmel ad t-yurar akken ad nessiweḍ ɣer tukksa n tidet n ussehres seg Uneẓruf Utrim yellan d akal aneggaru, deg Tefriqt, ur yesɛin tafulmant deg wahil n Useqqamu Uzzig.

 

Akken neẓra, a Mass aselway, nella d tahrest (colonie) taspenyulit seg 1884 ɣer 1975, yernu yella-d waya s ubeḍḍu-nni ahersan ay d-yettwaheyyan deg Usarag n Berlin n 1885 anda tinezmarin tuṛufiyin bḍant amenẓaw-nneɣ (continent) akken ay gant i Temrikt Talatinit deg yiwen n wemtawa ay yettwastenyan deg Tordesillas 4 n leqrun uqbel. Iɣerfan n sin-a n yimenẓawen ssawḍen, deffir yiwen n yimenɣi ɣezzifen, akken ad ɣeḍlen azaglu ahersan, yernu mɛawanen i uheyyi n tneɣtust tis 1514 n Dujembeṛ n 1960 ay yuɣalen tesɛa azal n Magna Carta n Tukksa n Ussehres, yernu d taneɣtust-a ay d-yeslulen Aseqqamu-a.

 

Aɣref aṣeḥrawi ur yelli yernu ur yezmir ad yili d tasureft (exception) i tukksa n ussehres, dɣa s waya ay yebda imenɣi-nnes uzrif (légitime) akken ad yaweḍ ɣer uzarug aɣelnaw. Naqal yebda imenɣi s yebriden imelwiyen, sakkin, seg 1973, ikemmel imenɣi s webrid awḥid ay as-d-yeqqimen, imenɣi imselleḥ ddaw ṛṛay n Terni n POLISARIO. Nessarem adabu ahersan ed udeblan aspenyuli, yeḍḍfen Aneẓruf Utrim, ad yeg lwajeb-nnes deg wayen yerzan tukksa n ussehres akken ay yenwa ad yeg aya s nneyya-nnes. Lwajeb-a yettwassefra-d deg wacḥal n tneɣtusin n Useqqamu Amatu n Yeɣlanen Yeddukklen, am waken ay d-yettwassefra deg ṛṛay ay d-yessuffeɣ Wexxam n Ccṛeɛ Agraɣlan n 16 Tubeṛ 1975 ed uṛabul n tuɣdaḍt tanerzaft ay yuzen Useqqamuè-a ɣer Uneẓruf Utrim deg Mayu n 1975.

 

D acu kan, Spenyul ur tgi lwajeb-nnes. Deg wemkan n waya, tefka tamurt-nneɣ d weɣref-nneɣ i snat n tmura tinaragin (voisins), Meṛṛuk ed Muriṭanya, ay d-iẓedmen, bḍan yernu ḍḍfen tamurt-nneɣ deg ukatar n wayen umi semman Imtawayen (accords) n Madrid n 14 Wember 1975. Maca, deg tebṛat-nnes n 26 Fuṛaṛ 1975 i umaru amatu n Yeɣlanen Yeddukklen, yenna-d unabaḍ aspenyuli dakken yettwali “tukksa n ussehres seg Uneẓruf Utrim ur tettili teṣleḥ arma yessenfali-d weɣref aṣeḥrawi lebɣi-nnes i lmend n waya s webrid iṣelḥen”.

 

Stenyant snat-nni n tmura ay d-iẓedmen, 3 n yiseggasen sakkin, beṛṛa i Yeɣlanen Yeddukklen yernu deffir weɛrur n weɣref aṣeḥrawi, yiwen n wemtawa (accord) uffir deg Yunyu n 1972 akken ad bḍunt akal aṣeḥrawi, akken ay d-yekcef uselway amuriṭani aqbur, Mokhtar Ould Daddah, deg yiwen n wedlis ay d-yeffɣen seg melmi kan, “La Mauritanie contre vents et marées" (Muriṭanya mgal waḍu ed yigefran). Tuǧǧit ay teǧǧa Spenyul tamurt-a d weẓdam ucrik n Muriṭanya ed Meṛṛuk snekren-d amgaru (guerre) d aqesḥan mgal weɣref ur yesɛin leslaḥ yernu yedhec s tedyanin ay la d-iḍerrun ɣef yiɣef-nnes deg wakud aydeg Iɣlanen Yeddukklen ur gin acemma izaden. D acu kan, aɛewwel n weɣref aṣeḥrawi ed temsetlelt n umenẓaw-nneɣ afriqi ed waṭas n tmura niḍen, ladɣa deg Temrikt Talatinit d Kaṛayib, d ayen yesxeṣren iɣawasen n snat-a n tmura ay d-iẓedmen. Muriṭanya tejbed iman-nnes seg wemgaru s yisem n wemtawa n talwit ay testenya ed Terni n POLISARIO deg Ɣuct n 1979, sakkin testeɛṛef, deg Fuṛaṛ n 1984 yernu s webrid unṣib, s Tegduda Taɛṛabt Taṣeḥrawit Tamegdayt yuɣalen, ass-a, d tamaslaḍt tummidt deg Tdukli Tafriqit.

 

Deffir 16 n yiseggasen n wemgaru (guerre) aydeg uzzlen aṭas n yidammen, testeɛṛef Meṛṛuk s tilawt ed tebṛat ibanen n wemɣiwan (communauté) agraɣlan ay d-yeddan deg tneɣtust 34/37 n Useqqamu Amatu n Yeɣlanen Yeddukklen ed tneɣtust 104 (XIX) n Tqacuct Tis 19 n Tuddsa n Tdukli Tafriqit. Teqbel aɣawas n talwit ay d-heyyan Yeɣlanen Yeddukklen s wemɛawen d Tuddsa n Tdukli Tafriqit (yuɣalen ass-a d Tadukli Tafriqit), d aɣawas yebnan ɣef westeɛṛef s wezref n weɣref aṣeḥrawi ad yefren, s tlelli, azekka-nnes s tsefrant i ugguccelman. Aseqqamu n Tɣellist n Yeɣlanen Yeddukklen yeqbel aɣawas-nni s tneɣtusin-nnes 658 (1990) d 680 (1991), am waken ay d-yessebded tuɣdaḍt n Yeɣlanen Yeddukklen, MINURSO, ay yesɛan lewṣaya ibanen akken ad tessuddes tasefrant n ugguccelman akken ad yefren weɣref n Uneẓruf Utrim gar uzarug neɣ annummed deg tmurt ay as-yeḍḍfen akal-nnes, akken ay d-yettwabder deg tneɣtust 34/37 n Useqqamu Amatu n Yeɣlanen Yeddukklen.

 

S waya, ilul-d ussirem n talwit deg tehrest (colonie) tafriqit taneggarut akk yellan deg wahil n Useqqamu-a. Tasefrant (référendum) yella yessefk ad d-tili 6 n wayyuren deffir ussefɛel n weḥbas n yimenɣi gar yidisan yellan ttnaɣen gar-asen, d aḥbas n yimenɣi ay d-yellan ass n 6 Ctembeṛ 1991.

 

Tasefrant werɛad ur d-telli. Maɣef? Tiririt fessuset. Meṛṛuk, tamurt yeḍḍfen akal aṣeḥrawi, tenkeṛ akk lɛuhud-nnes ay tga asmi ay teqbel aɣawas (plan) n talwit, yernu tga aya deg wakud aydeg Iɣlanen Yeddukklen gan yiwen n ccɣel ɣlayen, d win n unadi ɣef wakk wid ay yesɛan azref ad deɣren (voter). Deg tebṛat ay yettwaznen i umaru amatu n Yeɣlanen Yeddukklen deg Yebrir n 2004, tenna-d Meṛṛuk dakken tesseɣret-d – seg yidis-nnes - tanaya-nnes ɣef Uneẓruf Utrim, yernu tettwali dakken, ɣef wakken ay d-tenna deg wawal-nnes, “tasefrant aydeg ad d-yeddu wefran n uzarug d ayen ad yessidfen ccek deg tnaya n Meṛṛuk ɣef Uneẓruf” (ifuk wawal-nnes).

 

Iban dakken afakul-a (argument) ur yejhid, acku, akken ay d-iḥettet umaru amatu n Yeɣlanen Yeddukklen n yimir-nni, Kofi Annan, deg uṛabul-nnes n Tubeṛ n 2004, deg wawal-nnes: “Meṛṛuk teqbel yagi afran n uzarug [indépendance]” (ifuk wawal-nnes) deg tsefrant ay tella tetteddu ad tt-teg MINURSO.

 

Seg wasmi ay tuɣal Meṛṛuk deg wawal-nnes, tebda txeddem s uɛewwel akken ad teswaɣ ussisen (efforts) n tukksa n ussehres ay la ttgen Yeɣlanen Yeddukklen. S waya, akk ussisen ay iga wemɣiwan agraɣlan ed yebdammasen (médiateurs), ula d imeqranen seg-sen am James Baker ed wid ay t-id-iḍefren (yernu llan xedmen ddaw tneɣtusin n Useqqamu n Tɣellist) mlalen-d iɛewwiqen iquranen n udabu yeḍḍfen akal aṣeḥrawi, yernu ikemmel udabu-a iḥeṛṛes-aɣ akken ad nefren tifrat n diri akk ay izemren ad tili.

Ayen ay d-yesskanayen aya nezmer ad t-naf deg yinaw (discours) n ugellid n Meṛṛuk i weɣlan-nnes deg 6 Wember 2015, i lmend n umulli wis 40 n weẓdam-nsen ɣef Uneẓruf Utrim, mi d-yenna deg wawal-nnes: “Aneẓruf ad yeqqim deg Meṛṛuk yernu Meṛṛuk ad teqqim deg Uneẓruf arma d asmi ad ifak zzman” (ifuk wawal-nnes).

 

D ayen ibanen dakken, zik, llant tmura ijehden ugar ay d-yennan awal icuban aya ɣef tehras-nsen (colonies). Fṛansa tenna-t-id ɣef Ldzayer. Puṛtugal tenna-t-id ɣef Angula ed Muzambik. Spenyul tenna-t-id ɣef Ginya Tasebgast ed Uneẓruf Utrim. Ti d cchadat yeddan mgal tmeẓla (logique) n umezruy. Yernu ass-a, deg lqern wis 21, awal am wa yella-d d acqirrew ilem –ayɣef nesḥissif- i wemɣiwan agraɣlan ed yimenzayen ed tneɣtusin n Yeɣlanen Yeddukklen ay yettwalin dakken amenzay n ugguccelman n yiɣerfan yellan ddaw ussehres neɣ tuḍḍfa tawerdanit d ayen ayɣef ur yelli wemciweṛ. D tidet daɣ, yernu nesḥissif ɣef waya, dakken Aseqqamu n Tɣellist, ḍḍamen n tummda n Uɣawas n Talwit n 1991, ay yefkan i tuɣdaḍt n MINURSO ssebba-nnes akken ad tili, mazal-it la irewwel ɣef tmasit-nnes ddaw Uɣawas n Talwit d Werkawal n Yeɣlanen Yeddukklen, ula ma tidyanin ay d-yeḍran seg melmi kan sskanayent-d dakken tezmer ad taweḍ tegnit ɣer wanda ur d-tettuɣal. 

 

 Llan, deg tzeɣɣa-a, aṭas n yimaslaḍen (membres) yezgan ed wid ur yezgin deg Useqqamu. Nwala, ɣer yidis n umenẓaw (continent) afriqi ed wakk amɣiwan agraɣlan, ussisen imeqranen ay gan kra n yimaslaḍen n Useqqamu akken ur aɣ-ttaǧǧan ad naweḍ ɣer tenqiḍt aydeg ulac uɣal. Banen-d wussisen-a s wedɣar-nsen ed ussefhem n wedɣar-nsen ɣef tneɣtust tis 2285 n Useqqamu n Tɣellist ay iɛeddan seg melmi kan. Nesnemmir-iten ɣef waya.

 

Akken neẓra, a Mass aselway, deg wayyur n Meɣres yezrin, ur teǧǧi Meṛṛuk amaru amatu n Yeɣlanen Yeddukklen ad yerzu ɣef Leɛyun anda ay tella tesɣimt (siège) n tuɣdaḍt n MINURSO. D acu kan, ikemmel Ban Ki-moon isurifen niḍen n terzi-nnes ɣef temnaḍt. Iwala s tiṭṭawin-nnes tagnit aydeg yella weɣref aṣeḥrawi ama deg yegriren n yezrazaɣen (réfugiés), ama deg temnaḍin yettwaslellin, am waken ay d-yenna s lejheṛ dakken iḥuza-t mliḥ wayen ay iwala.

 

Ta d tagnit n yiwen n weɣref ay d-yettwaẓẓɛen seg temdint-nnes s lelsaḥ n tredsa (armée) n tuḍḍfa, yettwaḥettem ad yedder deg tegnit iweɛṛen deg wakud aydeg tiɣbula (ressources) n tmurt-nnes la ttwakarent, ma d imezdaɣen yeqqimen deg yikalen yettwaḍḍfen, mazal-iten ddren ddaw wemḥaq aqesḥan n temsulta, akken ay d-kecfen Yeɣlanen Yeddukklen ed tuddsiwin n yizerfan n wemdan s ttbut. Tagnit-a adennit ad tḥaz tafrit n yal anabaḍ amegday iḥemmlen talwit.Mi yerza umaru amatu ɣef temnaḍt, yesseqdec awal n tuḍḍfa akken ad d-yebder tagnit aydeg yella weɣref aṣeṛhawi. Aya ur yessewham. Agraw Amatu n Yeɣlanen Yeddukklen yettwali, deg tneɣtusin-nnes (resolutions) 34/37 ed 35/19, dakken tagnit n Uneẓruf Utrim d tin n “tuḍḍfa taserdasant”. Nnig waya, grent-d snat-a n tneɣtusin tiɣri i Meṛṛuk akken (deg wawal-nsent) “ad tfak tuḍḍfa n Uneẓruf Utrim” (ifuk wawal-nsent). Aya d ayen yellan. Ti d tineɣtusin n Yeɣlanen Yeddukklen. Aya ur yelli d asnulfu. “Tuḍḍfa” maci d immekti (concept) amaynu, maca Meṛṛuk tesseqdec aya akken ad d-tebdu taḥemla n ucemmet mgal umaru amatu n Yeɣlanen Yeddukklen, yernu ad d-taf ssebba ad tessedrem ayen ay d-yeqqimen seg ukala asertan akken “ad teqqim Meṛṛuk deg Uneẓruf arma d asmi ad ifak zzman”. Awal-a n “arma d asmi ad ifak zzman” ur d taɣemsa ay tt-id-yesnulfan. Wi d awalen ay d-yeffɣen seg yimi n ugellid n Meṛṛuk s timmad-nnes.

Ayen yugaren aya netta dakken dduṛt kan deffir tḥemla-nni ay d-yellan mgal umaru amatu, ttwaẓẓɛen yixeddamen iɣarimen (civils) ed yisertanen n tuɣdaḍt n MINURSO deg wass n 14 Meɣres, seg wakal n Uneẓruf Utrim ur yesɛin tafulmant. Deffir ma teccmet Meṛṛuk amaru amatu, yernu tenna-d dakken anmahal (ambassadeur) Ross d amdan wukud ur tebɣi ad texdem, tefren Meṛṛuk ad tecqirrew Aseqqamu n Tɣellist. Deg tneɣtust-nnes 2258 (2016), yefka Useqqamu tallit n 90 n wussan i yixeddamen n MINURSO akken ad uɣalen ɣer Uneẓruf Utrim. Maca Meṛṛuk mazal-itt tugi, ar imir-a, akken ad uɣalen yixeddamen-a, yernu mazal tefka s weɛrur i wayen yebɣa Useqqamu.

 

S tezwel, d ti ay d tiɣawsiwin yellan deg wenrar, a Mass aselway. D ti ay d tiɣawsiwin yellan deg tidet, ur llint d asnulfu wala d aferriɣ. Tellam d inagan n waya akk. Ayen ay d-nniɣ sseddaɣ-d yid-s ttbut.  

 

Ssuref-iyi ad d-iniɣ, deg tgara, dakken yezmer lḥal aql-aɣ deg tegnit aydeg ur yessaweḍ wemɣiwan agraɣlan – ladɣa Aseqqamu n Tɣellist – akken ad yeg ccɣel-nnes, yernu ur yessaweḍ ad iḥudd akala (processus) n tukksa n ussehres seg tehrest tafruqut taneggarut akk yellan deg wahil n Useqqamu-a. Lemmer ad yefren Useqqamu n Tɣellist ad yesseqdec tasertit n Pontius Pilatus, yessefk Aseqqamu Amatu ed Useqqamu-a, s lxuṣuṣ, ad kemmlen tamasit-nsen deg wayen yerzan tukksa n ussehres.

Nnig waya, yessefk ad nẓer mliḥ d acu ay izemren ad d-yekk lemmer ad yexṣer ukala asertan deg temnaḍt yellan deg tegnit n tɣellist n diri. Lemmer ad yedrem ukala asertan aydeg yeḍmeɛ aṭas weɣref aṣeḥrawi, ala abrid n wemgaru (guerre) ay d-yeqqimen, yernu ad d-naf iman-nneɣ nuɣal ɣer tenqiḍt tamezwarut n 1975. S waya, tezmer ad tuɣal tegnit ɣer yimenɣi ireẓmen, aɛeḍḍel deg wenḍerri n weɣref ilemri (innocent) ed tmerniwt n ccwal deg temnaḍt-a ay yenḍerren yagi seg wuguren yellan deg temnaḍtn n Ssaḥel.

 

Tirni n POLISARIO ur tebɣi uɣal ɣer yimenɣi imselleḥ. Neẓra, seg ttejṛiba-nneɣ ed tin n yiɣerfan niḍen, dakken amgaru d netta ay d afran n diri akk i uferru n tlufa, ladɣa mi ad tili taluft-nni tezmer ad tettwefru s yebriden uɣrimen (civilisés) n lemcawṛat yeṣfan yeddan ed yimenzayen ed tneɣtusin n Yeɣlanen Yeddukklen yeqqnen ɣer tukksa n ussehres. Tettwali Terni n POLISARIO dakken mazal tella tlemmiẓt akken ad ssuggten Yeɣlanen Yeddukklen ussisen i ussukkes n temnaḍt-a seg yimenɣi. D acu kan, lemmer ad yuɣal yimenɣi d tifrat ayɣef ur telli trewla imi wid ay izemren ad gen kra fernen ur ttgen acemma, deg tegnit-a, ad neg lwajeb-nneɣ yernu ad nennaɣ ɣef wezref n weɣref-nneɣ i uzarug. 

I lmend n waya, nger-d tiɣri i Useqqamu Uzzig ass-a ugar ussan niḍen, akken ad yeddem tamasit-nnes. Ur tessefk tsusmi ɣef wanect-a. Aql-aɣ gar yebriden yernu yal ad naɣ abrid n talwit ad idumen s lemcawṛat ddaw leɛnaya n Yeɣlanen Yeddukklen, ya ad naɣ abrid umi ur tban tuffɣa.

 

Deg tmuɣli-nneɣ, Aseqqamu yennulfa-d akken ad d-yelhu s tukksa n ussehres. S waya, ur yessefk ad yagad Useqqamu seg tuggziwin (menaces), ama d tid ibanen neɣ d tid yeffren, am waken ur yessefk ad t-tessekref tiddit n wid ay yebɣan ad ssuggten lḥess akken ad sneflen Aseqqamu-a seg tmasit-nnes tahaggart (noble), tin ay yeddem i uferru n taluft n tehrest tafriqit taneggarut akk yellan deg wahil-nnes.

Deg wayen yerzan taluft n Uneẓruf Utrim s timmad-nnes, addud d win ibanen. Ta d tamsalt n tukksa n ussehres ay yessefken ad tettwefru s ussefɛel n umenzay n ugguccelman akken ay t-id-tessefra tneɣtust 1514 (XIX) ay d-yeslulen yernu tella d ṛṛuḥ n Uɣawas n Uferru ay yessawḍen ɣer wefraq n tuɣdaḍt n MINURSO. Addud-a yessefk ad yeqqim yernu ad d-yettwawekked.

 

Nnig waya, yuzen Useqqamu tuɣdaḍt ɣer Uneẓruf Utrim deg Mayu n 1975. Yella-d waya ugar n 40 n yiseggasen aya. S waya, yewɛeṛ ad nefhem maɣef ur iɛawed yuzen Useqqamu tuɣdaḍt niḍen ar ass-a, am wakken ay yewɛeṛ ugar ad nefhem maɣef iṛabulen ed lekwaɣeḍ-nnes n uxeddim ɣef Uneẓruf Utrim ttwagamen-d seg yiṛabulen yegzulen (résumés) irusriden, isemmaḍen ay d-yettwagmen seg yiṛabulen ay yettakf umaru amatu i Useqqamu n Tɣellist. S waya, d akud, a Mass aselway ed yimaslaḍen ɛzizen n Useqqamu, akken ad nfak tizzelgi-a. D akud ad nuɣal ɣer Uneẓruf Utrim yernu ad d-neḥku ḥekku usrid ɣef tɣawsiwin yeqqnen ɣer taluft-a. 

 

Deg tgara, Tirni n POLISARIO tessutur seg Useqqamu ad d-yeg timlilit tuzzigt (spéciale) ɣef Uneẓruf Utrim.

 

Tanemmirt-nwen s tussda.

 





Courtesy of Tlaxcala
Source: http://www.spsrasd.info/news/es/articles/2016/06/02/2138.html
Publication date of original article: 02/06/2016
URL of this page : http://www.tlaxcala-int.org/article.asp?reference=18154

 

Tags: Uneẓruf Utrim Tukksa n ussehres
 

 
Print this page
Print this page
Send this page
Send this page


 All Tlaxcala pages are protected under Copyleft.