Manuel Talens yemmut ass n ttlata 21 Yulyu deg Valencia s ssebba n yiwen n waḍḍan ay yuḍen acḥal aya. S ṛṛwaḥ-nnes, nesṛuḥ daɣ agmat, ameddakel, amendid. Manuel ur yesɛi amtil yerna aṭas aya ay neẓra aya, seg wasmi ay t-yessebɛed waḍḍan fell-aɣ. Ṛṛwaḥ-nnes yeǧǧa-d gar-aneɣ amruj d alqayan.
Manuel yeǧǧa tabanta-nnes n yimsujji (ṭṭbib) akken ad yels tin n umaru d yimsuɣel. Seg ussileɣ-nnes
(formation) ed ttejṛiba-nnesn yimsujji, teqqim-d deg-s tezmert-nnes akken ad isel i wiyaḍ yerna ad yefhem lqerḥ aydeg llan. Manuel yella d yiwen seg 3 n yimeɣnasen ay d-yesbedden aẓeḍḍa n Tlaxcala yerna d netta ay d amaru agejdan n Teskint ay d-yellan d llsas n ussebded n uẓeḍḍa ed usmel-nneɣ n Tlaxcala deg Fuṛaṛ n 2006.
Manuel yella d asduklan (communiste) war akabar, d agrawal (révolutionnaire) war adasil (dogme), d « asuqraṭi n llsas » imi ay yella yettamen s tenfalit (devise) tasnagt (sage) n Yigrikiyen n Atina: « Taɣawsa tawḥidt ay ssneɣ nettat ur ssineɣ acemma ». Nella nettawi-d acḥal n tsaɛtin nekkni nessawal ɣef wayen ay la iḍerrun deg umaḍal, yerna seg wasmi ay nekrent tegrawliwin taɛṛabin, yerna la yetteg akk ayen umi yezmer akken ad yefhem ayen ay la iḍerrun yerna ad yeččaṛ lqella-nnes n tmussni ɣef umaḍal aɛṛab.
Nemyussan nekk yid-s deg 2005 s temsalt tafalesṭinit, asmi ay nemɛawan ad d-nessuqqel yiwen n udiwenni d aɣezfan ay iga d umekkat n usaksufun, amaru d uneggal isṛayili aqbur Gilad Atzmon. Aḍris-nnes azwel-nnes « Ccbaḥa d leslaḥ aserti » yerna yezmer uzwel-a ad yili d tanfalit n Manuel, ladɣa imi ulac ayen ay yellan yesserfay-it am urkay-nni ay rekkin kra n yideggen ay d-yessuɣulen iḍrisen akken kan d-tusa – akken ay yella yettini-d « s uraṭiw » - imi tisuɣlin am tid-nni ur ttqadarent ara imeskaren (auteurs), wala imeɣriyen, wala imdanen-nni ay tent-id-igan.
Manuel yurar dduṛ d ameqran i ussebded n yilugan n tezdeg n ccɣel deg uẓeḍḍa-nneɣ n yimsuɣlen, yerna yettekka deg usserked n kra n yilugan iḥerfiyen. Alugen amezwaru: akken ad d-yessuɣel yiwen kra n uḍris, yessefk ad t-yefhem. Alugen wis sin: mi ara d-yessuɣel yiwen kra n uḍris, yessefk ad t-yerr yettwafham. D acu kan, nesḥissif imi werɛad ur uɣalen ara medden akk ttgen aya. Nufa-d tafyirt n José Marti ay d-yessegzalen tafelsuft tucrikt ay nella la nɛerreḍ ad tt-id-nebnu: « Tasuɣelt d aɛawed n tira seg tutlayt ɣer tayeḍ. Nekk ttwaliɣ dakken tasuɣelt tugar imi ay tezmer ad tili d asɛeddi n uxemmem seg tutlayt ɣer tayeḍ ».
Deg wakk tisuɣlin-nnes, ama s tespenyulit, s tefṛensist neɣ s tanglizit, Manuel yella d win ay yesɛeddayen axemmem seg tutlayt ɣer tayeḍ. Tamdint aydeg ay d-ilul d Taɣernaḍt, yerna a win yufan ad as-ssersen deg-s asebdad ɣer yidis n win n Yehuda Ibn Tibon, Baba-s n yimsuɣlen. Manuel yella d yiwen seg warraw-nnes ay yuklalen tajmilt.
Deg Santa Clara, Kuba, deg 2005, deg umqam n Che Guevara: seg uyeffus ɣer uzelmaḍ, Carlos Tena, Manuel Talens, Quintín Cabrera ed Gennaro Carotenuto.
EDITORIALS & OP-EDS 
